Athar Shakeel
niyyat ho agar nek to deta hai ḳhuda bhi
karte hain amal log to milta hai sila bhi
batin ki hararat se phunke jaate hain tan-man
purva.i bhi chalti hai barasti hai ghaTa bhi
chhu kar nahin guzri hai tiri zulf-e-muattar
is baar to mahrum chali aa.i saba bhi
ik tum ho ki bichhḌe to bichhaḌ hi ga.e ham se
milte hain bahut log to hote hain juda bhi
adab-e-mohabbat the ki daman nahin chhoḌa
tum duur na the duur na the band-e-qaba bhi
kis yaas ke aalam men hon kya janiye ‘at.har’
muddat hui aa.i nahin honTon pe dua bhi
Leave a Reply