Kya Sochte Ho Ab Phulon Ki Rut Bit Gai Rut Bit Gai

Majeed Amjad

kya sochte ho ab phulon ki rut biit ga.i rut biit ga.i

vo raat ga.i vo baat ga.i vo riit ga.i rut biit ga.i

ik lahr uThi aur Duub ga.e honTon ke kanval a.ankhon ke diye

ik gunjti andhi vaqt ki baazi jiit ga.i rut biit ga.i

tum aa ga.e meri bahon men kaunain ki pengen jhuul ga.iin

tum bhuul ga.e, jiine ki jagat se riit ga.i rut biit ga.i

phir tair ke mere ashkon men gul-posh zamane lauT chale

phir chheḌ ke dil men Tison ke sangit ga.i rut biit ga.i

ik dhyan ke paanv Dol ga.e ik soch ne baḌh kar thaam liya

ik aas hansi ik yaad suna kar giit ga.i rut biit ga.i

ye lala-o-gul kya puchhte ho sab lutf-e-nazar ka qissa hai

rut biit ga.i jab dil se kisi ki piit ga.i rut biit ga.i