Syed Ahmed Shameem
kal mujhe dekh ke tha aa.ina chaunka jaise
mere chehre men chhupa ho koi chehra jaise
ham-kalami bhi miTati nahin duuri ki ḳhalij
beach se TuuT gaya dard ka rishta jaise
lahr halki si fazaon men jo ubhri Duubi
dard ki shaḳh se TuuTa koi patta jaise
kitne bikhre hue ḳhvabon ka khanDar lagta hai
vaqt ne de diya us shaḳhs ko dhoka jaise
dil ko chhuti hui yuun dard ki lahren guzrin
phir koi jhiil men lagta hai ki Duuba jaise
yuun har ik fard-e-tahayyur ki hai tasvir ‘shamim’
shahr men rasta bhula hua bachcha jaise
Leave a Reply