Sambhla Nahin Dil Tujhse bichhaD Kar Kai Din Tak

Shaz Tamkanat

sambhla nahin dil tujh se bichhaḌ kar ka.i din tak

main a.ina tha ban gaya patthar ka.i din tak

kya chiiz thi ham rakh ke kahin bhuul ga.e hain

vo chiiz ki yaad aa.i na aksar ka.i din tak

ai shaḳh-e-vafa phir vo parinda nahin lauTa

main ghar men tha nikla nahin bahar ka.i din tak

vo bojh ki thi jis se mire sar ki bulandi

vo bojh gira uTh na saka sar ka.i din tak

ham ne bhi bahut us ko bhulane ki dua ki

ham ne bhi bahut dekha hai ro kar ka.i din tak

kahte hain ki a.ina bhi dekha nahin us ne

sunte hain ki pahna nahin zevar ka.i din tak

ham taan ke so.e the ki kyuun aa.ega vo ‘shaz’

deta raha dastak vo barabar ka.i din tak