phuul kya chiiz hai kali kya hai
bin tumhare ye zindagi kya hai
ujḌe dil se zara koi puchhe
suune sahra men dil-lagi kya hai
vo jo nauha paḌha kare bulbul
kya bata.ega naghmagi kya hai
meri guftar sidq-e-paiham hai
phir ye suraj ki raushni kya hai
gar taraddud ho aazma dekho
haath kangan ko aarsi kya hai
meri ankhon men paḌ ga.e halqe
koi puchhe ki dil-lagi kya hai
parda chehra se thoḌa sarka do
ham bhi dekhen ki mai-kashi kya hai
ek purza sahi magar likh do
paḌhe likkhe ko farsi kya hai
jam-e-didar ab pila bhi do
had se baḌh kar ye be-ruḳhi kya hai
yak-ba-yak aa ga.i ‘falak se sada
ye shikayat ki phuljhaḌi kya hai
Leave a Reply