mire suune ujḌe dayar men kabhi do ghaḌi hi qayam kar
ho jo dil to us men sukun le tira ji kare to ḳhiram kar
main tamam umr guzar duun jise sochte jise chahte
tu jo kar sake mire ham-nava to vo ek pal mire naam kar
mujhe apne dil ka vo raaz de jo ḳhushi se mujh ko navaz de
vo jo mujh men ruuh si phunk de kisi roz aisa kalam kar
miri dhaḌkanon ka ye silsila tire pyaar se hai ravan-davan
tu jo chahe is ko davam de jo nahin to is ko tamam kar
sar-e-sham mujh se tu mil vahan jahan ujlaton ka na ho nishan
kahin duur tak yuun hi saath chal mira haath haath men thaam kar
tiri chahaton ka faqir huun mujhe qurbaton ki niyaz de
zara paas aa ke tu mil mujhe yunhi duur se na salam kar
koi kaam karna hai gar ‘zaki’ to ye kaam kar mire dosta
kahin nafraton ko na ja mile tu mohabbaton ko yuun aam kar
Leave a Reply