Kis Tarah Khilte Hain Naghmon Ke Chaman Samjha Tha Main

Asar Lakhnavi

kis tarah khilte hain naghmon ke chaman samjha tha main

saz-e-hasti par tujhe jab zaḳhma-zan samjha tha main

kya ḳhabar thi ham-nava ho ja.enge sayyad ke

baagh ka apne jinhen sarv-o-saman samjha tha main

qaidi-e-be-ḳhanuman zindan se chhuTe bhi agar

aur kuchh baḌh ja.enge ranj-o-mehan samjha tha main

tabe-e-gardish hain kis ke inqilabat-e-jahan

kya kahegi teri chashm-e-pur-fitan samjha tha main

is tarah dil chaak hota hai na yuun TukḌe jigar

lala-o-gul hain tire ḳhun-e-kafan samjha tha main

to mila jis ko use kya jaan o tan se vasta

tafraqa tha jis ko rabt-e-jan-o-tan samjha tha main

haqq-o-batil ka ‘asar’ miTne laga jab imtiyaz

taaza hoga qissa-e-dar-o-rasan samjha tha main