falak-nazhad sahi sar-nigun zamin pe tha main
jabin ḳhaak pe thi aur miri jabin pe tha main
gundhi paḌi thi miri ḳhaak ḳhal-o-ḳhad ke baghair
abhi humakta hua chak-e-avvalin pe tha main
ye tab ki baat hai jab kun nahin kaha gaya tha
kahin kahin pe ḳhuda tha kahin kahin pe tha main
naya naya main nikala hua tha jannat se
zamin bana.i ga.i jin dinon yahin pe tha main
ḳhuda ka hukm baja bad-gumani apni jagah
ghalat na tha mira inkar is yaqin pe tha main
ḳhuda ke jhagḌe men aḳhir dimagh haar gaya
ki dil sabat men tha aur nahin nahin pe tha main
Leave a Reply