Naeem Gilani
yuun sang-e-intizar se kab tak bandhe rahen
divar-e-na-rasa.i hi kyuun dekhte rahen
guzre na koi zud-faramosh umr-bhar
aur be-sabab gali ke dariche khule rahen
tum se gila-guzar hai apni ye be-ghari
kab tak tumhare ḳhvab se bahar paḌe rahen
halat vahi hai aaj bhi ham sang-o-ḳhisht ki
rakh de koi jahan pe vahin par dhare rahen
yunhi khaḌe rahen kisi manzil ki aas men
gard-e-malal-e-hijr se raste aTe rahen
puchhe mire masiha-nafas se koi ‘na.im’
taq-e-badan men zaḳhm kahan tak jale rahen
Leave a Reply