Yun Sang-E-Intizar Se Kab Tak Bandhe Rahen

yuuñ sañg-e-intizār se kab tak bañdhe raheñ

dīvār-e-nā-rasā.ī hī kyuuñ dekhte raheñ

guzre na koī zūd-farāmosh umr-bhar

aur be-sabab galī ke darīche khule raheñ

tum se gila-guzār hai apnī ye be-gharī

kab tak tumhāre ḳhvāb se bāhar paḌe raheñ

hālat vahī hai aaj bhī ham sañg-o-ḳhisht kī

rakh de koī jahāñ pe vahīñ par dhare raheñ

yūñhī khaḌe raheñ kisī manzil kī aas meñ

gard-e-malāl-e-hijr se raste aTe raheñ

pūchhe mire masīhā-nafas se koī ‘na.īm’

tāq-e-badan meñ zaḳhm kahāñ tak jale raheñ

Leave a Comment