lahu ki mai bana.i dil ka paimana bana Daala
jigar-daron ne maqtal ko bhi mai-ḳhana bana Daala
hamare jazba-e-tamir ki kuchh daad do yaaro
ki ham ne bijliyon ko sham.a ka shana bana Daala
sitam Dhate ho lekin lutf ka ehsas hota hai
isi andaz ne duniya ko divana bana Daala
bhari mahfil men ham ne baat kar li thi un ankhon se
bas itni baat ka yaron ne afsana bana Daala
mire zauq-e-parastish ki karishma-saziyan dekho
kabhi ka.aba kabhi ka.abe ko but-ḳhana bana Daala
shikayat bijliyon se hai na shikva bad-e-sarsar se
chaman ko ḳhud chaman valon ne virana bana Daala
chalo achchha hua duniya ‘hafiz’ ab duur hai ham se
mohabbat ne hamen duniya se begana bana Daala
Leave a Reply