kuchh haqiqat to hua karti thi insanon men
vo bhi baaqi nahin is daur ke insanon men
vaqt ka sail baha le gaya sab kuchh varna
pyaar ke Dher lage the mire gul-danon men
shaḳh se kaTne ka gham un ko bahut tha lekin
phuul majbur the hanste rahe gul-danon men
un ki pahchan ki qimat to ada karni thi
janta hai koi apnon men na beganon men
sar hi ham phoḌne jaa.en to kahan ja.enge
khokhle kanch ke but hain tire but-ḳhanon men
Leave a Reply