Zohheb Farooqui Afrang
maraz lagta hai jo mujh ko use meri dava samjhe
divana ho gaya huun main divanon ko vo kya samjhe
main apne aap men ḳhush huun mujhe is se gharaz kya hai
ki ye mujh ko bhala samjhe ki vo mujh ko bura samjhe
bichhaḌne ka vo ham se naam tak lene se ghabra.e
jise ham hijr kahte hain use vo bad-dua samjhe
gunahon se bacha jaa.e kahan tak is zamane men
ki har ik moḌ par milte hain vo jin se ḳhuda samjhe
bharosa kya mohabbat kab tumhen badnam kar jaa.e
ki ashiq ko hamesha hi zamana sar-phira samjhe
hamen vo kis saza ke vaste tayyar karta hai
jo apne bhi gunahon ko hamari hi ḳhata samjhe
vo ham se niind ke raste sahi par ru-ba-ru to ho
kabhi to ankhon men bhar le hamen bhi ḳhvab sa samjhe
hamen ‘afrang’ zalim se shikayat hai to itni hai
ham us ko to samajhte hain vo ham ko bhi zara samjhe
Leave a Reply