Karwan Sust Rahbar Khamosh

karvan sust rahbar khamosh

kaise guzrega ye safar khamosh

tujhe kahna hai kuchh magar khamosh

dekh aur dekh kar guzar khamosh

yuun tire raste men baitha huun

jaise ik sham-e-rahguzar khamosh

tu jahan ek baar aaya tha

ek muddat se hai vo ghar khamosh

us gali ke guzarne valon ko

takte rahte hain bam-o-dar khamosh

uth gae kaise kaise pyare log

ho gae kaise kaise ghar khamosh

ye zamin kis ke intizar men hai

kya khabar kyuun hai ye nagar khamosh

shahr sota hai raat jaati hai

koi tufan hai parda-dar khamosh

ab ke beda guzar gaya to kya

hain abhi kitne hi bhanvar khamosh

chadhte dariya ka Dar nahin yaaro

main huun sahil ko dekh kar khamosh

abhi vo qafile nahin aae

abhi baithen na ham-safar khamosh

har-nafas ik payam tha ‘nasir’

ham hi baithe rahe magar khamosh

Leave a Comment