Mohsin Aftab Kelapuri
taan kar siine ko chalne hi nahin deti mujhe
buzdili ghar se nikalne hi nahin deti mujhe
koshishen apni taraf se kar ke main ne dekh liin
zindagi lekin sambhalne hi nahin deti mujhe
honT par taale laga kar chhin leti hai qalam
zahar-e-dil duniya ugalne hi nahin deti mujhe
sochta huun main bhi ho ja.un zamane ki tarah
par miri fitrat badalne hi nahin deti mujhe
mere siine men jo patthar hai pighal jaata magar
jo ana mujh men hai jalne hi nahin deti mujhe
Leave a Reply