Pandit Jagmohan Nath Raina Shauq
ye kis ki justuju hai aur main huun
maqam-e-dasht-e-hu hai aur main huun
chaman men dekhta phirta huun kis ko
fareb-e-rang-o-bu hai aur main huun
ba-roz-e-hashr taaza gul khilega
vo daman ka lahu hai aur main huun
kabhi divana tha par ab huun hushiyar
gareban ka rafu hai aur main huun
himaqat hazrat-e-va.is ki dekho
taqaza-e-vuzu hai aur main huun
na puchho dil men kya kya hasraten hain
tumhari aarzu hai aur main huun
bhala ho tishna-kami aur tera
mai-o-jam-o-subu hai aur main huun
rahunga kah ke dil ka majra sab
are mahshar men to hai aur main huun
vo kahte hain kaho ai ‘shauq’ kya hai
are ḳhalvat hai tu hai aur main huun
Leave a Reply