na koi dost dushman ho sharik-dard-o-gham mera
salamat meri gardan par rahe bar-e-alam mera
likha ye davar-e-mahshar ne meri fard-e-isyan par
ye vo banda hai jis par naaz karta hai karam mera
kaha ghuncha ne hans kar vaah kya nairang-e-alam hai
vajud gul jise samjhe hain sab hai vo adam mera
kashakash hai ummid-o-yas ki ye zindagi kya hai
ilahi aisi hasti se to achchha tha adam mera
dil-e-ahbab men ghar hai shagufta rahti hai ḳhatir
yahi jannat hai meri aur yahi bagh-e-iram mera
mujhe ahbab ki pursish ki ghairat maar Dalegi
qayamat hai agar ifsha hua raz-e-alam mera
khaḌi thiin rasta roke hue lakhon tamanna.en
shahid-e-yas huun nikla hai kis mushkil se dam mera
ḳhuda ne ilm baḳhsha hai adab ahbab karte hain
yahi daulat hai meri aur yahi jah-o-hasham mera
zaban-e-hal se ye lucknow ki ḳhaak kahti hai
miTaya gardish-e-aflak ne jah-o-hasham mera
kiya hai faash parda kufr-o-din ka is qadar main ne
ki dushman hai barhaman aur adu shaiḳh-e-haram mera
Leave a Reply