Sajjad Baluch
lahr us aankh men lahra.i jo be-zari ki
ham ne hanste hue phir kuuch ki tayyari ki
mujh ko jis raat samundar ne utara ḳhud men
main ne us raat bhi sahil ki taraf-dari ki
ham ne girye ko bhi adab ke andar rakkha
apne a.asab pe vahshat na kabhi taari ki
naqsh-e-pa DhunDhta phirta hai sahar ka vo bhi
jis pe ik raat bhi guzri nahin bedari ki
raushni parda-e-mizgan se chhini jaati hai
kis ne ye ḳhvab-gah-e-dil men ziya-bari ki
dil men bhar laaya huun mahrumi-e-duniya ‘sajjad’
aaj bazar se phir main ne ḳharidari ki
Leave a Reply