Hain Ahl-E-Nazar Yahan Pe Sabhi Ghalat Koi Kaam Ho Na Sake

hain ahl-e-nazar yahan pe sabhi ghalat koi kaam ho na sake

sharab-e-kuhan vo pi ke chale jo mast-e-ḳhiram ho na sake

na koi lagan na dil men chubhan na rashk-e-suḳhan na rang-e-chaman

nahin tha jinhen shu.ur-e-vafa vo aali maqam ho na sake

jo tira-shabi ne chhoḌa mujhe to dil se mire uThi ye sada

ujale zara ḳhayal rahe sahar kabhi shaam ho na sake

the honT mire usi ke liye zamane se be-qarar magar

ye qaid mujhe laga di ga.i ki lab pe vo naam ho na sake

lahu men naha ke vo hi chala likha tha jabin pe jis ki ḳhuda

the aur bhi da.ave-dar yahan magar vo imaam ho na sake

ḳharid ke la na paoge tum milenge nahin dukan pe usuul

the sahab-e-zar hazar magar vafa ke ghulam ho na sake

bandha ke miri ummid kisi ne duur kahin khila.e gulab

tha shauq-e-junun bala ka magar payam-o-salam ho na sake