main ab tak ye samajhti thi
kahani ka na dil hai
aur na goyai
saliqa hi nahin inkar ka is ko
hamesha likhne vaale ki
raza par chhod deti hai
vajud apna
kabhi munh se nahin kahti
ki mujh ko is taraf modo
jidhar main chahti huun
aur yahan tak ki
kai kirdar mar jaate hain
phir bhi aankh se is ki
kabhi aansu nahin girte
kahani kitni sabir hai
kabhi aghaz hi milta nahin is ko
kabhi anjam se mahrum rahti hai
kabhi aisa bhi hota hai
ki afsane ka khaliq
apne afsane men is ko
paanv bhi dharne nahin deta
to ye khamoshi si
ik karb ki chadar men
apna munh chhupae
laut jaati hai
koi shikva nahin karti
magar kal shab
main jab tanhai men baithi
kahani likh rahi thi to
mujhe aisa laga jaise
varaq par ek aansu hai
jo main ne ghaur se dekha
jahan aurat likha main ne
vahin vo ashk tapka tha
Leave a Reply