Poet
lauT aa.ega dekhna mire dost
jagmaga.ega rasta mire dost
hazrat-e-‘dagh’ ke main saa.e men huun
hazrat-e-‘jaun-eliya’ mire dost
kuchh gunahgar bhi hain yaar mire
aur hain chand parsa mire dost
main tujhe chhoḌ kar na jaata magar
aaḌe aa.i miri ana mire dost
main mira kamra meri vahshat tu
ḳhamushi shor ik ḳhala mire dost
kabhi fikr-e-ma.ash aur kabhi dil
dukh hain mere juda juda mire dost
yaar ‘e.azaz’ chal nikalte hain
maut ne mujh se kah diya mire dost
Leave a Reply