miri hasti saza hone se pahle
main mar jaata baḌa hone se pahle
hamare saath uThta baiThta tha
vo ik banda ḳhuda hone se pahle
vo qibla is gali se ja chuka tha
namaz-e-dil ada hone se pahle
mohabbat ik musalsal hadisa thi
hamare be-vafa hone se pahle
main apni zaat se na-ashna tha
ḳhuda se ashna hone se pahle
ḳhizan men phuul sa lagta tha mujh ko
vo patthar aa.ina hone se pahle
bahut mazbut si divar tha main
kisi ka rasta hone se pahle
Leave a Reply