Shairi Mein Ek Tamasha Ab Wo Dikhlane Ko Hai

Rauf Raheem

sha.iri men ik tamasha ab vo dikhlane ko hai

maar kar meri ghazal mahfil pe chha jaane ko hai

saare ullu kya karenge sochta huun raat bhar

tirgi ka raaj ab duniya se miT jaane ko hai

bad-dua hai husn valon ki jo hai ashob-e-chashm

un ko dekha pyaar se aur aankh ab aane ko hai

ab tarannum ki rivayat bhi purani ho ga.i

ek sha.ir apni ghazlen saaz par gaane ko hai

sha.iri men bhi siyasat ghus ga.i hai dosto

parTi baazi yahan bhi jaal phailane ko hai

hosh uḌati hai girani saare mai-ḳhvaron ke aaj

kaun kahta hai sharaf hasil ye mai-ḳhane ko hai

bhuuk ki janib na jaa.e zehn bachchon ka mire

is liye T V mira ab dil ke bahlane ko hai

hai bajaT ghaTe men jurmane zaruri hain yahan

is liye sarkar meri luuT kar khane ko hai

ahl-e-fan sab ja rahe hain chhoḌ kar duniya ‘rahim’

sha.iri men ab tumhari daal gal jaane ko hai