Irfan Sattar
batata hai mujhe a.ina kaisi be-ruḳhi se
ki main mahrum hota ja raha huun raushni se
kise ilzam duun main ra.egan hone ka apne
ki saare faisle main ne kiye ḳhud hi ḳhushi se
har-ik lamhe mujhe rahti hai taaza ik shikayat
kabhi tujh se kabhi ḳhud se kabhi is zindagi se
mujhe kal tak bahut ḳhvahish thi ḳhud se guftugu ki
main chhupta phir raha huun aaj apne-ap hi se
vo be-kaifi ka aalam hai ki dil ye chahta hai
kahin ru-posh ho ja.un achanak ḳhamushi se
sukun-e-ḳhana-e-dil ke liye kuchh guftugu kar
ajab hangama barpa hai tiri lab-bastagi se
ta.alluq ki yahi surat rahegi kya hamesha
main ab ukta chuka huun teri is varaftagi se
jo chahe vo sitam mujh par rava rakkhe ye duniya
mujhe yuun bhi tavaqqo.a ab nahin kuchh bhi kisi se
tire hone na hone par kabhi phir soch lunga
abhi to main pareshan huun ḳhud apni hi kami se
raha vo multafit meri taraf aur in dinon men
ḳhud apni samt dekhe ja raha be-ḳhudi se
koi ḳhush-fikr sa taza-suḳhan bhi darmiyan rakh
kahan tak dil ko bahla.un main teri dilkashi se
karam tera ki ye mohlat mujhe kuchh din ki baḳhshi
magar main tujh se ruḳhsat chahta huun aaj hi se
vo din bhi the tujhe main valihana dekhta tha
ye din bhi hain tujhe main dekhta huun bebasi se
abhi ‘irfan’ ankhon ko bahut kuchh dekhna hai
tumhen be-rang kyuun lagne laga hai sab abhi se
Leave a Reply