Lamha Lamha Ek Nai Sai-E-Baqa Karti Hui

Azad Gulati

lamha lamha ik na.i sa.i-e-baqa karti hui

kaT rahi hai zindagi ḳhud ko fana karti hui

teri chup hai ya mire andar macha kohram hai

koi shai to hai zaban ko be-nava karti hui

apne andar reza reza TuuT kar bikhra huun main

hai ye kya shai chor dil ka aa.ina karti hui

kisht-e-jan se din ko kaTti hai na.e zaḳhmon ki fasl

raat aati hai inhen phir se hara karti hui

mere hone se na hone ka sabab paida hua

mujh ko hasti hi thi ḳhud mujh se juda karti hui

maut to ‘azad’ hai azadiyon ka ik jahan

zindagi hai har nafas ḳhud ko riha karti hui