ḳhud ko kisi ki rah-guzar kis liye karen
tu ham-safar nahin to safar kis liye karen
jab tu ne hi nigah men rakkha nahin hamen
ab aur kisi ke zehn men ghar kis liye karen
kyuun tujh ko yaad kar ke ganva.en hasin shaam
palkon ko tere naam pe tar kis liye karen
mansub-e-jan ho aur koi paikar-e-ḳhayal
kar sakte hain ye kaam magar kis liye karen
kyuun chhoḌ den na shaam se pahle hi tera shahr
tujh se bichhaḌ ke raat basar kis liye karen
kis ke liye charagh jala.en tamam raat
‘nasik’ phir ehtimam-e-sahar kis liye karen
Leave a Reply