zindagi vaadi o sahra ka safar hai kyuun hai
itni viran miri rah-guzar hai kyuun hai
tu ujale ki tarah aa ke lipaT ja mujh se
ik andhera sa idhar aur udhar hai kyuun hai
roz milta hai koi dil ko lubhane vaala
phir bhi tu hi mira mahbub-e-nazar hai kyuun hai
ghar ki tasvir bhi sahra ki tarah hai lekin
farq itna hai ki divar hai dar hai kyuun hai
jis ko dekhun vahi barbad hua jaata hai
aadmi kya hai mohabbat ka khanDar hai kyuun hai
main samundar huun magar pyaas hai qismat meri
mere daman men agar ‘ashk’ guhar hai kyuun hai
Leave a Reply