Qayyum Nazar
chanaren vadiyon men mushta.il hain
daregha sarv abhi tak pa-ba-gil hain
uThe hain lala-e-ḳhunin-kafan phir
yahi sho.ale jahan-e-mustaqil hain
agar do-gam par manzil hai phir kyuun
chaTanen zindagi ki munfa.il hain
gulon par be-dili ka rang kyuun hai
anadil sahn-e-gulshan men ḳhajil hain
rafu ho ja.enge chak-e-baharan
ḳhizan ke ghaav dekho mundamil hain
khanakte hi rahe shishe to kis kaam
labon tak jaam ja pahunchen to dil hain
ga.e manzil-ba-manzil daar tak ham
marahil ishq ke kab jan-gusil hain
mile hain ba.ad muddat ke to jaana
bahut apne kiye par munfa.il hain
Thikana kya hai aise doston ka
muqabil hain na mere muttasil hain
Leave a Reply