Siddique Afghani
jhonka nafas ka mauja-e-sarsar laga mujhe
raat aa ga.i to ḳhud se baḌa Dar laga mujhe
itna gudaz hai mira dil fart-e-dard se
phenka kisi ne phuul to patthar laga mujhe
ḳhud hi ubhar ke Duub gaya apni zaat men
suraj ik iztirab ka paikar laga mujhe
ye sham-e-va.ada hai ki paḌav hai vaqt ka
ik lamha ik sadi ke barabar laga mujhe
jaise main teri zaat ka aks-e-jamil huun
yuun bhi tire firaq men akasr laga mujhe
is shor men muhal tha tera ḳhayal bhi
sahra bhi tere shahr se behtar laga mujhe
daman se dho raha tha main dhabbe gunah ke
qatra bhi ansuon ka samundar laga mujhe
taaza hava men sukh ka koi saans le sakun
ai rabb-e-ka.inat zara par laga mujhe
Leave a Reply