Chandni Pandey
zindagi ki yahi kahani hai
saans aani aur jaani hai
tum jo hote to baat kuchh hoti
ab ki barish to sirf paani hai
ik taraf us ki bolti ankhen
ik taraf meri be-zabani hai
yuun hi sunte rahen agar dil ki
yaad rakhiye ki jaan jaani hai
dhuup lagti hai badalon jaise
ye mohabbat ki saebani hai
bahti jaati huun ek samundar men
us ki yadon ki badbani hai
har taraf khaar khaar hain gulshan
baghban khuub baghbani hai
ashna huun main ab sarabon se
main ne sahra ki khaak chhani hai
‘chandani’ ki ghazal-vazal sahab
us ke khvabon ki tarjumani hai
Leave a Reply