Khursheed Rizvi
ye shohrat hai ki rusva.i magar had se ziyada hai
main ḳhud itna nahin saaya mire qad se ziyada hai
mire dil ki girah baten banane se nahin khulti
ki mujh men bastagi kuchh qufl-e-abjad se ziyada hai
kisi ke paas harf-e-dil-nashin baaqi nahin varna
qubul ab bhi dilon ki ḳhaak men rad se ziyada hai
suvaida ko mire nisbat bahut hai sang-e-asvad se
magar naqsh-e-kaf-e-pa-e-mohammad se ziyada hai
ye jan-e-na-tavan meri ye shauq-e-be-aman mera
tavana.i kaf-e-sailab men sad se ziyada hai
Leave a Reply