Varis Kirmani
qaza jo de to ilahi zara badal ke mujhe
mile ye jaam inhi ankhḌiyon men Dhal ke mujhe
main apne dil ke samundar se tishna-kam aaya
pukarti rahin maujen uchhal uchhal ke mujhe
nigah jis ke liye be-qarar rahti thi
saza mili hai usi raushni se jal ke mujhe
main rahzanon ko kahin aur dekhta hi raha
kisi ne luuT liya paas se nikal ke mujhe
kahan nujum kahan raste ki gard-e-haqir
ajiib vahm hua tere saath chal ke mujhe
ab ek saya-e-be-ḳhanuman bhi saath men hai
ye kya mila hai tire shahr se nikal ke mujhe
vahi haqiqat-e-umr-e-daraz ban ke rahe
kisi ne ḳhvab diye the jo chand pal ke mujhe
koi bhi jab hadaf-e-ḳhanjar-e-ada na mila
vo dasht-e-gham se uTha le ga.e machal ke mujhe
Leave a Reply