ab to dil o dimagh men koi ḳhayal bhi nahin
apna junun bhi nahin us ka jamal bhi nahin
us se bichhaḌ ke ziist men ye hi gila raha mujhe
us se juda bhi huun magar jiina muhal bhi nahin
ishq ki jang men miyan ye hi usuul hai baja
haath men us ke tegh ho aap ke Dhaal bhi nahin
mujh ko kahin mili nahin koi bhi rah-e-pur-sukun
samt-e-junub bhi nahin samt-e-shumal bhi nahin
mere badan pe tha kabhi us ke badan ka pairahan
aaj bala ka hijr hai jism pe shaal bhi nahin
ye bhi kamal hi to hai qabil-e-dad sahiban
aaj kalam-e-‘jashn’ men koi kamal bhi nahin
Leave a Reply