parinda qaid men kul asman bhuul gaya
riha to ho gaya lekin uḌaan bhuul gaya
mire shikar ko tarkash men tiir laaya magar
vo meri jaan ka dushman kaman bhuul gaya
use to yaad hai saara jahan mere siva
main us yaad men saara jahan bhuul gaya
vo shaḳhs zindagi bhar ka thaka hua tha magar
jo paanv qabr men rakkhe thakan bhuul gaya
gharib-e-shahr ne rakkhi hai aabru varna
amir-e-shahr to urdu zaban bhuul gaya
tamam shahr ka naqsha banane vaala ‘raza’
junun-e-shauq men apna makan bhuul gaya
Leave a Reply