gul ki ḳhunin-jigari yaad aa.i
phir nasim-e-sahari yaad aa.i
aaj farman-e-riha.i pahuncha
aaj be-bal-o-pari yaad aa.i
dushman abad rahen jin ke tufail
apni ali-guhri yaad aa.i
jab kisi ne miri ankhen si diin
tab mujhe dida-vari yaad aa.i
saaz jab TuuT ga.e ham-nafaso
ab tumhen naghmagari yaad aa.i
kabhi raushan jo hui sham-e-bahar
baagh ki be-basari yaad aa.i
kam na the gardish-e-dauran ke gile
kyuun tiri kam-nazari yaad aa.i
pahle ma.alum na tha dil ka maqam
ab tumhen shisha-gari yaad aa.i
aaj arbab-e-ḳhirad ko ‘abid’
meri shorida-sari yaad aa.i
Leave a Reply