Gopal Mittal
jo shua-e-lab hai mauj-e-nau-bahar-e-naghma hai
ḳhamushi bhi aap ki a.ina-dar-e-naghma hai
gosh ik muddat se mahrum-e-sama.at hai magar
dil ajab nadan hai ab tak e’tibar-e-naghma hai
farq ye hai nutq ke sanche men Dhal sakta nahin
varna jo aansu hai durr-e-shah-var-e-naghma hai
munkir-e-saz-e-masarrat huun to kafir huun magar
ham-nafas mizrab-e-gham par inhisar-e-naghma hai
ai ki shikva tha tujhe sangin-mizaji ka miri
dekh is patthar men bhi mauj-e-sharar-e-naghma hai
Leave a Reply