Azm Shakri
dil men hasrat koi bachi hi nahin
aag aisi lagi bujhi hi nahin
us ne jab ḳhud ko be-naqab kiya
phir kisi ki nazar uThi hi nahin
jaisa is baar khul ke ro.e ham
aisi barish kabhi hui hi nahin
zindagi ko gale lagate kya
zindagi umr-bhar mili hi nahin
muntazir kab se chand chhat par hai
koi khiḌki abhi khuli hi nahin
main jise apni zindagi samjha
sach to ye hai vo meri thi hi nahin
Leave a Reply