Hawa Se ujaD Kar Bikhar Kyun Gae

havā se ujaḌ kar bikhar kyuuñ ga.e

vo patte jo sarsabz shāḳhoñ pe the

harī ghaas kis ke lahū se jalī

vo titlī ke rañgīn par kyā hue

nahīñ koī chiḌiyā kisī Daal par

daraḳhtoñ pe makḌī ne jaale bune

darīchoñ ke shīshoñ kā dil toḌ kar

makāñ ḳhālī rūhoñ ke maskan bane

hai ḳhabroñ ke chehroñ pe vahshat bahut

maiñ dekhūñ jo un ko mirā jī Dare

jo āñkhoñ kī ‘fikrī’ hañsī chhīn leñ

vo kis tiira jañgal ke haiñ bheḌiye

Leave a Comment