tiri gali men tamasha kiye zamana hua
phir is ke ba.ad na aana hua na jaana hua
kuchh itna TuuT ke chaha tha mere dil ne use
vo shaḳhs meri muravvat men bevafa na hua
hava ḳhafa thi magar itni sang-dil bhi na thi
hamin ko sham.a jalane ka hausla na hua
mire ḳhulus ki saiqal-gari bhi haar ga.i
vo jaane kaun sa patthar tha a.ina na hua
main zahr piita raha zindagi ke hathon se
ye aur baat hai mera badan hara na hua
shu.ur chahiye tartib-e-ḳhar-o-ḳhas ke liye
qafas ko toḌ ke rakkha to ashiyana hua
hamare gaanv ki miTTi hi ret jaisi thi
ye ek raat ka sailab to bahana hua
kisi ke saath ga.iin dil ki dhaḌkanen ‘qaisar’
phir is ke ba.ad mohabbat ka hadisa na hua
Leave a Reply