Kaif Bhopali
kuTiya men kaun aa.ega is tirgi ke saath
ab ye kivaḌ band karo ḳhamushi ke saath
saaya hai kam khajur ke unche daraḳht ka
ummid bandhiye na baḌe aadmi ke saath
chalte hain bach ke shaiḳh o barhaman ke saa.e se
apna yahi amal hai bure aadmi ke saath
sha.istagan-e-shahr mujhe ḳhvah kuchh kahen
saḌkon ka husn hai miri avargi ke saath
sha.ir hikayaten na suna vasl o ishq ki
itna baḌa mazaq na kar sha.iri ke saath
likhta hai gham ki baat masarrat ke mood men
maḳhsus hai ye tarz faqat ‘kaif’ hi ke saath
Leave a Reply