khule jo ham to baḌhe ham men fasle kitne
ba-ja-e-shukr karam lab pe the gile kitne
kabhi salib kabhi zahr aur kabhi ḳhanjar
sabat-e-ishq mile hain tujhe mile kitne
koi gulu pe koi haath jeb-o-dastan par
rahe hain charagaron se muqable kitne
visal-o-hijr to do lafz hain mohabbat men
ta.alluqat men hain aur silsile kitne
hui hai ishq men tash.hir chak-daman ki
ye dekhiye to ki chak-e-jigar sile kitne
Leave a Reply