Ashk Ko Dariya Banaya Aankh Ko Sahil Kiya

Aurang Zeb

ashk ko dariya banaya aankh ko sahil kiya

main ne mushkil vaqt ko kuchh aur bhi mushkil kiya

ek mayusi hi dil men kab talak rahti mire

main ne mayusi men dil ka ḳhauf bhi shamil kiya

niind ki imdad jaise hi baham pahunchi mujhe

aankh ke maqtal men apne ḳhvab ko daḳhil kiya

varna tera chhoḌ jaana jaan le jaata miri

karb men aansu mila kar dard ko zaa.il kiya

jaise duniya dekhti hai vaise kab tak dekhte

dida-e-bina se dekhen ḳhud ko is qabil kiya

ek chehra aur do ankhen le ga.e bazar men

girvi rakh ke un ko phir ik aa.ina hasil kiya

varna vo kab baat sunta tha kisi ki bazm men

main ne apne sher se us shaḳhs ko qaa.il kiya

be-niyazi se guzare umr ke battis saal

kho diya kab jaane tujh ko kab tujhe hasil kiya

rat-din ulTa laTak kar zaat ke kuuen men ‘zeb’

soch ki na-puḳhtagi ko mashq se kamil kiya