dil men kya us ko mila jaan se ham dekhte hain
balki jaan hai vahi jab dhyan se ham dekhte hain
chupke baithe hue hairan se ham dekhte hain
tum to dekho tumhen kis shaan se ham dekhte hain
dil nikal jaata hai be-sakhta us dam apna
dar men jis dam tujhe dalan se ham dekhte hain
kahte hain ek tumhin to nahin ham par marte
saikdon jaate hue jaan se ham dekhte hain
vaan se mayus chale to hain na puchho phir kuchh
pichhe phir phir ke kis arman se ham dekhte hain
kya gila aap ka jo ham ko dikhae qismat
aaj kuchh aur hi saman se ham dekhte hain
kuchh ruka sa jo unhen dekhte hain mahfil men
munh ko ek ek ke hairan se ham dekhte hain
allah allah re ai but tiri afzaish-e-husn
tujh ko har lahza nai aan se ham dekhte hain
haae qismat ki adu kahne ko apna matlab
munh lagate hain tire kaan se, ham dekhte hain
kabhi jaane ka irada jo vo karte hain ‘nizam’
haae us vaqt kis arman se ham dekhte hain
Leave a Reply