ainuddin-azim

Surkh-Ru Sab Ko Sar-e-Maqtal Nazar Aane Lage

surḳh-ru sab ko sar-e-maqtal nazar aane lage

jab hue ham aankh se ojhal nazar aane lage

shahr vaalo jaan lena gaanv mera aa gaya

bachchiyon ke sar pe jab anchal nazar aane lage

ham ne mangi bhi dua-e-abr-e-rahmat kis ghaḌi

jab saron par zulm ke badal nazar aane lage

aaine par aaj ke jamne na de maazi ki dhuul

taaki tera aane vaala kal nazar aane lage

ham vahan tak bhi na pahunche jis bulandi se gire

jab ki pichhḌe log bhi avval nazar aane lage

log to kahte the ‘azim’ ye kabhi phalti nahin

zulm ki Tahni pe kaise phal nazar aane lage

More Poems

Leave a Comment