Rais Amrohvi
duniya ko kya ḳhabar? miri duniya phir aa ga.i
vo ruh-e-naz o jan-e-tamanna phir aa ga.i
ai ruh-e-qais! tahniyat-e-shauq de mujhe
laila phir aa ga.i miri laila phir aa ga.i
ab aur kya hai chashm-e-tamasha ki aarzu
vo arzu-e-chashm-e-tamasha phir aa ga.i
kahte hue ki aap ke sirf aap ke liye
sab se bichhaḌ ke aap ki azra phir aa ga.i
ruThe hue the aap manane ke vaste
ye mujrim-e-gunah-e-tamanna phir aa ga.i
ahbab-e-raz-dan men yahi tazkira hai aaj
furqat-zada ‘ra.is’ ki duniya phir aa ga.i
Leave a Reply