Imdad Imam Asar
mere sar men jo raat chakkar tha
us ke zaanu pe ghair ka sar tha
apne ghar un ko kya bulate ham
boriya bhi nahin mayassar tha
zabt-e-dil par bhi us ki mahfil men
apna rumal ashk se tar tha
jaan dene men soch kya karte
muflisi par bhi dil tavangar tha
ḳhub-o-zisht-e-jahan ka farq na puchh
maut jab aa.i sab barabar tha
aap jab tak na le chuke the dil
kuchh mizaj aur banda-parvar tha
hijr lahiq hua visal ke ba.ad
kya hi ulTa mira muqaddar tha
jaur-e-a.ada ki taab kya laata
dil-e-kam-baḳht naz-parvar tha
sohbat-e-hur se hui nafrat
main jo teri ada ka ḳhugar tha
hai ‘asar’ ya nahin ḳhuda jaane
sunte hain us ka haal abtar tha
Leave a Reply