ajab saman hai
main band ankhon se tak rahi huun
khumar-e-shab men gulab-rut ki rafaqaton se mahak rahi huun
vo narm khushbu ki tarah dil men utar raha hai
men qurb-e-jan ki latafaton se bahak rahi huun
ye chahaton ki hasin barish ka moajiza hai
ki mary poren sulag rahi hain
main qatra qatra pighal rahi huun
main rang-o-khushbu ka lams pa kar
vafa ke paikar men dhal rahi huun
na main zamin par
na asman men
vo aisa jaadu jaga raha hai
gulabi barish sunahre sapnon ke saare matlab vo dhire dhire sujha raha hai
mujhe vo mujh se chura raha hai