aaj bhaḌki rag-e-vahshat tire divanon ki
qismaten jagne vaali hain bayabanon ki
phir ghaTaon men hai naqqara-e-vahshat ki sada
Toliyan bandh ke chalin dasht ko divanon ki
aaj kya suujh rahi hai tire divanon ko
dhajjiyan DhunDhte phirte hain garebanon ki
ruh-e-majnun abhi betab hai sahraon men
ḳhaak be-vaj.h nahin uḌti bayabanon ki
us ne ‘ehsan’ kuchh is naaz se muḌ kar dekha
dil men tasvir utar aa.i pari-ḳhanon ki
Leave a Reply