Riaz Majeed
sat.h-biin the sab, rahe bahar ki kaa.i dekhte
log kaise mere andar ki safa.i dekhte
us se milne ka nishan tak bhi nazar aata nahin
ek muddat ho ga.i rah-e-juda.i dekhte
ham to apni vus.at-e-dil se bhi koson duur the
tere dil tak kis tarah apni rasa.i dekhte
aap hi thak-har kar apne ko behis kar liya
zindagi kab tak tiri be-e’tina.i dekhte
yuun na kho jaate faza-e-yas men duniya ke saath
kaash apna hi lab-o-lahja raja.i dekhte
dil ki majburi se baḌh kar koi majburi na thi
ham bhi kuchh karte agar ḳhud se riha.i dekhte
kaash dharti par gira ḳhuun rang le aata ‘riyaz’
jite-ji ham apni faslon ki kaTa.i dekhte
Leave a Reply