Rohit Soni Tabish
garche mire ḳhulus se vo be-ḳhabar na tha
phir bhi miri vafaon ka us par asar na tha
main us fareb-e-husn se ḳhud ba-ḳhabar na tha
vo tha to mere saath ba-zahir magar na tha
apna use bana na saka main tamam umr
mujh men bahut hunar the magar ye hunar na tha
lab the ḳhamosh ḳhauf se iz.har-e-ishq ke
par ansuon ko mere kisi ka bhi Dar na tha
saare jahan ki ḳhaak ko ham chhanne ke ba.ad
lauTe to dekha apna ghar ab apna ghar na tha
bimar-e-gham ke vaste kya maut ke siva
koi ilaaj dahr men ai chara-gar na tha
kya mai-kade ka nazm bhi tabdil ho gaya
saaqi jo daur-e-jam idhar tha udhar na tha
hoti bhi fat.h kaise miri jab the saath saath
vo log jin ke shane pe ḳhud apna sar na tha
kyuun us ne ki na zahmat-e-chara-gari qubul
kya us ke paas chara-e-zaḳhm-e-jigar na tha
coffē tha mujh ko rah-e-vafa men ḳhayal-e-yar
‘tabish’ bala se koi mira ham-safar na tha
Leave a Reply