Poet
kah rahi hai saari duniya tera divana mujhe
teri nazron ne bana Daala hai afsana mujhe
ishq men ab mil ga.i hai mujh ko meraj-e-junun
ab to vo bhi kah rahe hain apna divana mujhe
dars-e-ibrat hai tumhare vaste mera ma.aal
ghuncha o gul ko sunana hai ye afsana mujhe
ik nigah-e-naz ne saaqi ki ye kya kar diya
rafta rafta kah uThe sab pir-e-mai-ḳhana mujhe
tu sarapa nuur hai main tera aks-e-ḳhas huun
kah rahe hain yuun tira sab a.ina-ḳhana mujhe
sun rahi thi shauq se duniya jise ai ham-nafas
yaad hai haan yaad hai vo mera afsana mujhe
nuur se bhar puur ho jaati hai bazm-e-arzu
jab kabhi vo dekhte hain be-hijabana mujhe
al-madad ai zohd baḌh kar rok le mere qadam
tishnagi phir le chali hai su-e-mai-ḳhana mujhe
ham-nafas meri to fitrat hi sana-e-husn hai
ishq ke bande kaha karte hain divana mujhe
mujh ko ‘qaisar’ mai-kade se nikle ik muddat hui
yaad karte hain abhi tak jaam o paimana mujhe
Leave a Reply